Tuesday, April 8, 2008

SINISINTANG BITUIN ni Leonard Gasid y Junio

Yaring aking puso’y lumulundag sa saya

Sa tuwing mamamasdan ang marikit mong mukha

Hatid mo sa akin ay walang kapantay na tigib at sigla

Tanda nga ito na ako ay nabihag mo nga


Sa tuwing aking madidinig

Ang napakalambing mong tinig

Katawan ko ay nanginginig

Tunay ngang sayo ako’y umiibig


Kakanyahan mo ay lubos na kahanga-hanga

Hungkag lang ang sayo’y hindi matunganga

Likas kang natatangi, ika’y ibang-iba

Ikaw ang siyang tinitibok nitong puso ko sinta


Ngunit ako ngayon ay nalulumbay

Sapagkat pag-ibig mong kay tamis at dalisay

Hindi na nararapat pa sa akin ay ialay

May nauna ng umangkin ng iyong pag-irog na taglay


Masakit tanggapin ngunit kailangang tiisin

Tumalima sa wasto’t hindi ang pansariling hangarin

Sa santinakpan ay isa kang maningning na bituin

Pangarap ka na lamang, hindi maaaring abutin

No comments: